«Мен сіздерге бір ақылды нәрсе айтайын…»

1 сәуір – Алматы. Ермек Тұрсыновтың сатира мен юморға арналған авторлық кеші көрермен көңілін жадыратты.

Күлкі мен ойға толы ерекше кеш Алматыдағы Лермонтов атындағы театр сахнасында өтті. Көрермен залында ине шаншар орын болмады. Ермек Тұрсыновтың «Мен сіздерге бір ақылды нәрсе айтайын…» деп аталатын кеші көрермендерді бей-жай қалдырмады.

Кеш басталғанда-ақ Ермек Тұрсынов ақ халатпен сахнаға шығып, психиатриялық аурухананың бас дәрігерінің кейпіне енді. Бұл – бүгінгі заманның шындығын астарлы жеткізудің тәсілі еді. Көрермендер бұл ишараны бірден ұғып, залда үнсіз түсіністік орнады.

— Әлем есінен адасты, — дегендей болды жазушы. — Бұл жағдайда кім дәрігер, кім науқас – айырмасы жоқ. Барлығымыз бір үлкен «емханада» өмір сүріп жатырмыз…

Осыдан кейін сахна төрінде шынайы драма басталды. Қаламгердің өткір тілімен өрілген сатира, қоғамға көзқарас, адамның ішкі толғанысы – бәрі бір мезетте әрі ащы, әрі күлкілі, әрі жүрекке жақын болып жетті.(«Облонскийлердің үйінде бәрі араласып кетті »). Бұл кеш – өзіне тән ерекше терапия, жан мен сананы емдейтін рухани сеанс болды.

Бүгінгі қоғамның қайшылығы мен түсініксіз шындығы көркем сөзбен бейнеленіп, көрерменнің жүрегіне жол тапты. Кімнің ақыл-есі түзу, кімнің жағдайы тұрақсыз – бұл шындықта шекара қалмағандай. Осындай бейберекет дүниеде жалғыз құтқарушы – шынайы күлкі. Ол бірде мұңлы, бірде ащы… Бірақ өмірді жеңілдетер күшке ие.

Сахнадан айтылған әрбір сөз, әрбір монолог – бүгінгі заманның айнасы. Бірақ Тұрсыновтың туындылары үміт отын сөндірмейді. Керісінше, олар: «Уайымдамаңдар, бәрі өткінші» деген үн қатқандай.

Ермек Тұрсынов – дәл сөздің шебері. Ол салмақтыны жеңіл жеткізіп, күлкімен көмкеріп, астарлы ойды тыңдарманға әсерлі етіп бере алады. Оның шығармашылығы – бұл жай ғана қойылым емес, бұл – жүрек пен жанды емдейтін сырласу, шынайы диалог.

Кеш соңында көрермен ұзақ қол соқты. Риза көңілмен қошемет көрсетті. Себебі олар сахнадан – шындықты, жанның шырқыраған үнін және үмітке толы күлкіні естіді.